ab ke barasaat kii rut aur bhii bha.Dakiilii hai
jism se aag nikalatii hai, qabaa giilii hai
[qabaa=saamane se khulaa huaa lambaa coat]
sochataa huu.N ke ab a.njaam-e-safar kyaa hogaa
log bhii kaa.Nch ke hai.n, raah bhii pathariilii hai
shiddat-e-karb me.n to ha.Nsanaa karb hai meraa
haath hii saKht hai.n za.njiir kahaa.N Dhiilii hai
gard aa.Nkho.n me.n sahii daaG to chehare pe nahii.n
lafz dhu.Ndhale hai.n magar fikr to chamakiilii hai
ghol detaa hai sama'at me.n vo miiThaa lahajaa
kis ko maaluum ke ye qi.nd bhii zahariilii hai
pahale rag-rag se merii Khuun nicho.Daa us ne
ab ye kahataa hai ke rangat hii merii piilii hai
mujhako be-rang hii na karade kahii.n rang itane
sabz mausam hai, hawaa surKh, fizaa niilii hai
merii paravaaz kisii ko nahii.n bhaatii to na bhaaye
kyaa karuu.N zehan "Muzaffar" meraa jibariilii hai
Home 
Thu Apr 26, 2007 2:52 pm
